Gin klaro ni Rey Demisana Team Leader sang City Legal Office Enforcement Unit nga 15 tanan ka mga stall sa Manokan Country sa Reclamation Area ang ila gin serbihan sang closure order subong nga adlaw Lunes Oktubre 3, 2022.
Suno kay Demisana, ini nga implementasyon gin base sa bayolasyon nga na komitir sang mga stall owners sa idalum sang Section 25, Article 20 sang City Ordinance number 565 ukon Bacolod City Revenue Code Series of 2011.
Dugang pa ni Demisana, napilitan ang CLO nga ipatuman ang amo nga mando bangod sa kapaslawan sang mga ini nga i-settle ang ila obligasyon nga balayran sa pihak sang Setyembre 30 nga deadline nga gin hatag sang syudad.
Dugang pa ni Demisana, wala man gin aktuhan sang mga stall owners ang pagdihon sang compromise agreement paagi sa talatapan sang City Treasurer’s Office.
Base sa record sang CLO, 18 tanan ka mga stall owners ang una nga gin padal-an sang notice of violation apang tatlo lamang diri ang naka areglo sang ila mga balayran.
Samtang, Wala gina paabot ni Bacolod City Councilor Celia Flor, Chairman sang Committee on Market angut sa kapaslawan sang 15 ka mga stall occupants sa Manokan Country nga magdihon sang compromise agreement sa syudad paagi City Treasurer’s Office kasunod sang ila gin patigayon nga pagsinapol tinalikdan nga semana.
Suno kay Flor, kaina lamang sang aga sini na diskobrehan nga wala gin asikaso sang mga tenant ang ila gin kasugtan nga proseso sa diin Setyembre 30 ang gin set nga deadline.
Dugang pa ni Flor, mahimo lamang nga maka balik ang operasyon sini nga mga tenants sa tion nga ila masunod ang gina require sang syudad nga pag dihon sang compromise agreement.
Gin panugyan man sang konsehal sa mga katapo sang City Legal Office Enforcement Unit nga dapat may yara sang kortisiya sa pagpatuman sang amo nga closure order. | Aksyon Art Tayhopon
