Narekober sang Bacolod City Police Office(BCPO)-City Drugs Enforcement Unit (CDEU) ang kapin 170,000 pesos nga balor sang ginasuspetsuhan shabu sa buy bust operation sa Purok Langis, Barangay Banago syudad sang Bacolod subong nga hapon sang Mayo 30, Sabado.
Duha ang nadakpan samtang nakapalagyo naman ang isa pa ka persona.
Ang mga nadakpan ginkilala kay Eugene Sotto, 32 anyos kag Reynaldo Ponteras Jr., 37 ang edad kag lunsay residente sang amo nga lugar.
Nakapalagyo naman ang isa pa ka suspect nga amo ang ginatudlo tag-iya sang puluy-an kun sa diin ginkasa ang buy bust operation.
Narekober sa buy bust operation ang apat ka dalagko kag napulo ka palaba nga sachet sang ginasuspetsuhan shabu nga may kabug-aton sang 21 gramos, isa ka improvised tooter kag 1,500 pesos nga kwarta nga kalakip na ang buy bust money.
Si Sotto ginakabig bilang High Value Individual (HVI) samtang si Ponteras naman isa ka newly identified drug personality.
Priso karun ang duha ka mga persona sa custodial facility sang Police Station 3 para sa nagakaigo nga disposisyon.
Ang nakapalagyo ang pasakaan man sang nagakaigo nga kaso. | Aksyon John Diaz