Narekober ang kapin 170,000 nga balor sang ginasuspetsuhan shabu sa separado nga buy-bust operation sini nga hapon, Enero 21, sa syudad sang Bacolod.
Una nga nadakpan sang Police Station 7 si Rommel Calansingin, 54 anyos sang Purok Katilingban, Brgy. Mansilingan, syudad sang Bacolod.
Suno kay Police Station 7 Commander Police Captain Elmer Bonilla, si Calansingin ang bodegero ukon nagahupot sang ilegal nga droga.
Narekober kay Calansingin ang napulo ka gramos sang ginasuspetsuhan shabu nga nagabili sang 68,000 ka pesos.
Samtang, nadakpan naman sang Police Station 8 si Dennis Olvido, 41 anyos sang banwa sang Murcia.
Si Olvido nadakpan sa Purok San Antonia, Brgy. Pahanocoy syudad sang Bacolod.
Narekober kay Olvido ang 15 ka gramos sang ginasuspetsuhan shabu nga nagabili sang 102,000 ka pesos.
Suno naman kay Police Station 8 Commander Police Major Joery Puerto, si Calansingin nga nadakpan sang Police Station 7 ang ginakuhaan ni Olvido sang ilegal nga droga.
Priso karun ang mga nadakpan sa natungdan nga Police Stations para sa nagakaigo nga disposisyon. | Aksyon John Diaz