Boluntaryo nga nagsungka sa otoridad ang 21 anyos nga lalaki matapos nakonsensiya sa ginhimo nga pagbuno nga nagresulta sa kamatayon sang iya kaupod sa inom, sa Purok Malipayon, Barangay Damutan, banwa sang Hinobaan.
Ang nagsungka ginkilala kay Vergelio Toreno kag ginkilala naman ang napatay sa kay Rogelio Rebles.
Suno kay Police Major Clifford Batadhay, hepe sang Hinobaan PNP, las 3 sang hapon sang Enero 8, upod pauli sanday Toreno kag Rebles halin sa ilimnan apang naglalisay nga ginhalinan sang pagka-impito sang suspetsado rason nga nahimo sini ang krimen.
Sa panaysayon ni Toreno, gindala sini sa sapa’ nga napalibutan sang mga kahoy ang patay nga lawas ni Rebles kag nagpauli siya nga pareho lamang nga wala sang may natabo.
Dugang pa ni Batadhay, nagsungka si Toreno sang nakonsensiya ini kag pressure man sang iya mga kaingod balay nga makapila ka beses nga nagpamangkot sa iya tungod ini ang ulihi nakita nga kaupod, antes gin-report nga nadula.
Mismo si Toreno ang nagtudlo sa lugar nga iya ginbutangan sang lawas ni Rebles. | Aksyon Alvin Grava