Ginkakas ang 300 million nga balor sang proyekto nga underground cabling sa syudad sang Bacolod sa listahan sang proyekto nga pondohan kuntane sa plano nga i-loan sang syudad.
Madumduman, una nga nagsumiter sang 5 billion loan application ang syudad sa DOF – Bureau of Local Government Finance pero 4.5 billion lamang ang ginatugutan nga ma loan sang syudad.
Ginpahayag ni Councilor Jude Thaddeus Sayson, chair sang committee on finance and appropriation, ginlakip pa sang DOF sa loan ceiling sang syudad ang gin utang sang LGU sa PNB sa pagpatukod sang Bacolod City Government Center bisan nga ini ang nabayaran na sang October 2022.
Bangud sini, ginpahayag ni Sayson, nga ginkakas sa listahan ang proyekto nga underground wiring nga balor 300 million pesos lakip man ang drainage project balor 100 million pesos kag iban pa nga proyekto.
Pero ginklaro ni Sayson, nga may iban nga pondo nga ginahulat ang syudad para sa sini nga mga proyekto kaangay sang drainage project halin sa gobyerno nasyunal.
Sa karon, nagahulat ang LGU sang approval sang 4.5 billion pesos nga loan application para maka negosyar na sa mga financial insitution kon diin ang nagatanyag sang lowest possible rates, may maayo nga terms and conditions kag grace period.
