Naglambot sa 310 ka mga registrants ang nag proseso sang ila application kahapon nga adlaw sa exclusive registration nga ginpatigayon sg COMELEC-Bacolod sa St Joseph School La Salle, Barangay Villamonte, Bacolod City kahapon, Hulyo 16.
Suno kay Bacolod Election Officer Atty. Kathrina Caña, madamo sg nagkadto kahapon kag nagpasalamat sa tikang nga ginhimo sg Bacolod Youth Coalition for Democracy (BaCod) kaupod ang SK Federation sg syudad sg Bacolod.
Ang BaCod ang isa ka non-partisan coalition nga ginabug-usan sang 15 ka mga nagkalain-lain nga grupo sang pamatan-on.
Dugang pa ni Caña, may mga ginaplano pa nga dugang nga Satellite Registration nga iga-anunsyo sa mga masunod nga adlaw.
Sa pihak nga bahin, madayon sa Hulyo 19 ang Election Registration Board hearing kon diin talakayon man ang 242 ka mga opposed registration.
Apang ginklaro ni Caña nga indi ma akomodar sa sulod sg isa ka adlaw ang tanan nga opposition case ilabi na nga ginarequire ang presensya sang tagreklamo kag sang mga ginareklamo.
Ang ERB Hearing ang magalawig tubtob Hulyo 23. | Aksyon Eden Aboso