Isa nalang sa 39 ka mga Bureau of Jail Management and Penology facility sa Western Visayas ang wala nagapatigayon sang full face-to-face visitation.
Suno kay Senior Insp. Mark Malhabour, spokesperson sang BJMP Region 6, ang 38 ka mga pasilidad ang nag-umpisa na sang full face-to face visitation sadto pang Disyembre apang nagapabilin sa non-contact visitation kag virtual visitation ang Iloilo City District Jail female dormitory bangud indi nila ma comply ang isa sa requirements nga dapat may dako nga lugar nga patigayunan sang face-to-face visitation.
Dugang pa, para sa mga pasilidad nga nagapatigayon na sang visitation, kinahanglan sa gihapon nga fully vaccinated with booster dose bangud kon wala, kinahanglan nila mag presentar sang negative RT-PCR swab test result nga nakuha sang 72 ka oras ukon anti-gen test result nga nakuha sa sulod sang 24 ka oras antes magbisita.
Samtang, ang mga newly committed Persons Deprived of Liberty ang ginapaidalom pa sa RT PCR test kag gina quarantine sang pito ka adlaw antes isaylo sa ila jail of origin.
Sa karon, wala na sang PDLs ukon Jail Personnel nga positibo sa covid19. | Aksyon Eden Aboso
