Masobra sa P700 million pesos ang budget allocations nga mabuhin sa Negros Occidental halin sa gobyerno nasyonal paagi sa national tax allotment (NTA) bangud sa pagnubo sa tax collection sang mga revenue agencies.
Ini ang ginpahayag ni Governor Bong Lacson, may kaangtanan sa gin-anunsiyo ni Finance Assistant Secretary Maria Teresa Habitan nga ang NTA nga sadto ginatawag nga Internal Revenue Allotment (IRA) sang mga local government units (LGUs), ang mabuhinan sang 14% bangud sa manubo nga tax revenue sa panahon sang pandemya.
Suno sa gobernador isa sang lubos nga maapektohan amo ang Maintenance and Other Operating Expenses (MOOE) sang Negros Occidental.
Dugang pa ni Lacson, ginpaalerto na ang tanan nga mga departamento sang gobyerno probinsiyal sa posible mangin epekto sini. Isa sa pagahimuon sang probinsiya amo ang pagpasanyog sa koleksyon sang local revenues.
Sa karon gin-umpisahan na sang probinsiya ang pagpreparar sa 2023 provincial budget agud mahibaluan kun anu pa nga mga operations ang maapektohan sa pagbuhin sang budget allocations sa mga LGUs. | Aksyon Marlon Genovea
