Na raffle na ang 90 ka mga pwesto sa fish section sang Central Market, Biernes sang aga, Setyembre 22.
Sa record sang LGU, may 104 ka mga fish vendors ang nalakip sa masterlist.
Pero may pila ka mga fish vendors ang nagreklamo matapos nga wala nalakip ang ila ngalan sa masterlist.
Ginpahayag ni City Legal Officer Atty. Romeo Carlos Ting Jr., ang mga nagreklamo ang wala ginlakip sa masterlist bangud may mga utang sa syudad pero iban sa ila ang nagpabutyag nga magbayad.
Suno kay Ting, may plano ang syudad nga magpatigayon sang night market sa Central Market para sa mga wala nagabutan sa raffle.
Ginapaabot ni Ting nga sa masunod nga semana makasaylo na ang mga fish vendor sa ila nga lugar kag 15 pesos ang ila arkabala sa kada adlaw.
Sa nahibaluan, temporaryo nga nagabaligya karon ang mga fish vendor sa may dalan Bonifacio matapos ginpaidalum sa renovation ang fish section.
