ABOGADO: TRICYCLE DRIVER NGA NAGABALABAG SA DRY RUN SANG E-JEEP PWEDE MAPASAKAAN SANG KASO

Share on facebook
Share on pinterest
Share on twitter
Share on print

Ginpahayag ni City Legal Officer Atty. Romeo Carlos Ting Jr., nga pwede mapasakaan sang kaso nga grave coercion ang mga tricycle driver nga nagabalabag sa dalan.

Ini matapos ang insidente ang pagbalabag sang mga triycle drivers sang ARVISTODA sa dalan sa pag umpisa sang dry run sang electric jeep halin sa relocation site.

Suno kay Ting, wala sang illegal sa dry run bangud may yara ini sang special permit halin sa LTFRB VI nga maga umpisa sa Mayo 15 tubtob 19, 2024.

Nagsuhestyon si Ting nga ma usisa ang mga dokumento sang mga naga protesta bangud posible sila mismo ang naga operate bilang colorom.

Suno kay Ting, kon magapadayon ang pagbalabag sa dalan sang mga tricycle drivers, maga suhestyon sila nga ipadakop ang mga ini.

Sa nahibaluan, ginakabalak-an sang mga 80 ka tricycle drivers sa idalum sang ARVISTODA nga ma apektuhan ang ila palangabuhian sa tion nga mag operate ang e-jeep sa lugar.

Samtang, ginatugyan sang e-Motors Philippines Inc. ang supplier sang e-jeep sa Bacolod, kay Mayor Albee Benitez ang desisyon matapos balabagan sang mga tricycle driver ang e-jeep nga ma dry run kuntane umpisa sa Progreso Village Relocation Site.

Suno kay Robert Cerrada, chief operating officer sang kompaniya, nagpanaug ang pila ka mga pasabero nga sakay na sa e-jeep matapos balabagan sang mga tricycle drivers nga wala nila ginapaabot.

Ginpahayag ni Cerrada, ang pagpamatok sang e-jeep sa Barangay Vista Alegre kag Barangay Cabug ang yara na sa LGU kag Barangay kag ila lamang ginsunod ang pangabay nga pag operate sang e-jeep sa green lanes.

Ginatan-aw ni Cerrada nga sa ulihe masulod man sa gihapon ang e-jeep bangud kabahin ini sang public transportation nga maga serbe sa publiko.

Ginpaathag ni Cerrada, ang green lanes ang developmental route kag gina tun-an ang kadamuon sang pasahero, ang oras sang pagbyahe kag ini ang isumiter sa LTFRB para ma justify nga posible ang ini nga rota.

What’s your Reaction?
+1
0
+1
0
+1
0
+1
0
+1
0
+1
0
+1
0

DA 6: POSIBLE NA MAGPATIGAYON SANG CLOUD SEEDING SA NEGROS OCCIDENTAL

Posible na ang pagpatigayon sang cloud seeding operations sa Negros Occidental.

Ini ang ginpahayag ni Department of Agirculture Assistant Regional Director Engr. Jose Albert Barrogo.

Sa phone patch interview, Myerkules, ginpahayag ni Barrogo, nga may nakit-an na nga seedable clouds sa probinsya rason nga posible na ang pagpatigayon sang cloud seeding.

Isa sa ginatan-aw ni Barrogo nga hangkat amo ang pondo sa cloud seeding nga magalambot sa 6 milyones pesos.

Suno kay Barrogo, nagpadulong si Regional Director Dennis Arpia sa Manila para magpangabay sang pondo sa office of the secretary sang DA.

Ginklaro ni Barrogo, nga sakop sang sini nga cloud seeding ang bug-os nga Western Visayas.

Ginpahayag ni Barrogo, may mga pag-ulan na nga ma eksperiensyahan pero pila lamang ka minutos pero magapabilin pa sa below normal ang temperatura sa bulan sang Mayo tubtob Hunyo 2024.

What’s your Reaction?
+1
0
+1
0
+1
0
+1
0
+1
0
+1
0
+1
0

SILAY SP NANINDUGAN NGA WALA SANG PAMULITIKA SA WALA PA PAGHATAG SANG RONO SA BULK WATER PROJECT

Nanindugan ang Sangguniang Panlungsod sang syudad sang Silay nga wala sang pamulitika sa isyu nga wala pa sila maka hatag sang resolution of no objection (RONO) sa 1.2 bilyones pesos nga Negros Occidental Bulk Water Project.

Sa phone patch interview, Myerkules, ginbasa ni Silay Vice Mayor Thomas Maynard Ledesma, ang opisyal nga statement sang ila konseho sa sini nga isyu.

Ginpahayag ni Ledesma, nagapangabay pa sang klaripikasyon ang pila ka miembro sang konseho lakip na dire kon ang proyekto ang maka apekto sa mga establisamento kag factories sa Silay nga nagasalig sa suba nga kuhaan sang tubig.

Luyag man maklarohan sang Konseho kon ang proyekto ang maka apekto sa sektor sang agrikultura, ang existing nga application sang Vivant Hydropower Plant sa Kapitan Ramon, ang impact sang proyekto sa environment.

Nasaad man sa statement nga ang proponent ang dapat nga magpangabay sang opinion sang mga eksperto kaangay sang DENR, Department of Agriculture, DRRM sa posible peligro nga madulot sang proyekto.

Luyag man sang Konseho nga mahibaluan ang benepisyo sang sini nga proyekto para sa Silay kag ang financial impact sa bili sang tubig sang Silay City Water District (SiCiWa)

Gin ehemplo sang Konseho ang mga potentional problems nga nagakatabo karon sa Cagayan De Oro nga may yara man sang Bulk Water Project kag indi luyag nga ini ang matabo man sa Silay.

Ginpahayag sang Bise-Alkalde, nga wala sang politika dire kag ila lamang dire ginalantaw ang welfare sang ila mga pumuluyo.

Nagalaum si Ledesma nga masabat ang ini nga mga pamangkot sa tion nga liwat nga mag presentar ang proponent sang sini nga proyekto.

RONO SANG TATLO KA BARANGAY, GINAHULAT

Ginahulat sang Sangguniang Panlungsod sa syudad sang Silay ang resolution of no objection sang tatlo ka mga Barangay nga posible ma apektuhan sang Negros Occidental Bulk Water Project.

Ginpahayag ni Vice Mayor Ledesma, ini nga mga Barangay ang ginalakipan sang Barangays Hawaiian, Kapitan Ramon, kag Guimbala-on.

Suno kay Ledesma, wala nila mapalambot ang mga concern sang ini ang gintalakay kaangay sa water summit bangud wala sila nakahibalo sa sini nga proyekto.

Ginpahayag sang Bise-alkalde, nga isa pa sa ginakabalak-an amo ang posible pagsaka sang water rate kon ang SiCiWa ang magabakal sang tubig sa sini nga proyekto.

Suno pa kay Ledesma, ginpalambot man sa ila sang SiCiWa nga may nagakaigo sila nga suplay sang tubig kag indi na kinahanglan magkuha sang tubig sa bulk water project.

What’s your Reaction?
+1
0
+1
0
+1
0
+1
0
+1
0
+1
0
+1
0

MORE STORIES:

LIKE US ON FACEBOOK

error: Ooops... You are not authorized to copy this content.