Patay ang isa ka anay miembro sang Armed Forces of the Philippines ukon AFP matapos gin alegar gin luthang sang 20 ka mga armado nga lalaki sa iya puluy-an sa Sitio Manggapa, Brgy. Masulog siudad sang Canlaon, las 5:30 sang aga, Oktubre 13.
Ginkilala ang biktima kay Celso Pedochino Jr, 8 na ka tuig nga retired member sang 11th Infantry Battalion kag residente sang amo nga lugar.
Suno kay Senior Inspector Wilfredo Alarcon, hepe sang Canlaon City PNP samtang nagapangape ang biktima nag abot ang amo nga mga lalaki kag nagpalapit kay Pedochino kag ginpamangkot kon siya si "Pido". Gin agda pa kuntani sang biktima ang amo nga mga lalaki nga mag pangape upod sa iya apang gilayon siya nga ginluthang sa pila ka beses nga naigo sa nagkalain-lain nga bahin sang iya lawas samtang nakapalagyo naman ang iya nga hinablos nga upod niya sang natabo ang krimen.
Dugang pa nga pahayag sang mga testigo pila sa mga lalaki ang nagasuksok sang camouflage uniform kaangay sang uniporme nga ginagamit sang mga militar.
Ginapatihan nga M16 kag kalibre .45 nga armas luthang ang gin gamit sang mga suspetsado sa pagluthang kay Pedochino.
Nahibaluan nga may mga pagpamahog na sa kabuhi si Pedochino sadto pa.
