Gin alegar sang militar nga may kahilabtanan sa anom ka krimen sa Southern Negros ang anom ka napatay sa engkwentro sa syudad sang Kabanklan sadtong Hwebes sang gab-i, Setyembre 21.
Suno kay Lt. Col. Jayjay Javines, Civic Military Officer sang 3rd Infantry Division sang Philippine Army, madugay na nga gina-monitor sang militar si Alejo Delos Santos Alyas Peter bangod ini ang ginatudlo lider sang armado nga grupo nga nagpatay sa pila ka tropa sang militar sa Cauayan kag Sipalay.
Paathag ni Javines nga ginatudlo ang anom ka napatay nga may kahimuan sa pagsunog sang backhoe kag pagluthang sa duha ka militar sa Barangay Camindangan, syudad sang Sipalay sadtong bulan sang Marso kag Nobyembre 2022.
Subong man, gin alegar nga ang grupo man ni Delos Reyes ang nag-ambush sa duha ka soldado sa Barangay Yaoyao, banwa sang Cauayan sang Abril 2021.
Palayag pa ni Javines, indi na mapanginwala sang mga rebelde ang nasambit nga mga krimen tungod ang ila pag-ako naka-post sa ila official website.
