May bag-o nga hepe sang kapulisan ang apat ka mga Local Government Units sa probinsya sang Negros Occidental epektibo sang Martes (Setyembre 27).
Nagbulos bilang hepe sang Talisay City PNP si Police Lt. Col. Cenon Vargas. Si Vargas ang natal-os kay Police Lt. Col Arthur Baybayan nga karun ginsaylo sa provincial headquarters sang Negros Occidental Police Provincial Office (NOCPPO) samtang nagahulat sang iya sayluhan nga pwesto sa Kampo Krame para sa iya promotion nga mangin full-pledged colonel.
Samtang, nagpungko bilang Officer-in-Charge sang Sipalay City PNP si Police Major Bryan Sagayadoro kag nagbulos kay Police Lt. Col. James Latayon Jr.
Suno kay Police Lt. Judesses Catalogo, Spokesperson sang NOCPPO, natapos na ni Latayon ang duha ka tuig nga termino bilang hepe sang Sipalay PNP kag karun ginsaylo man sa provincial headquarters kag nagahulat sang bag-o nga assignment.
Sanday Vargas kag Sagayadoro ang pareho nga gikan sa Police Regional Office-6 kag duha sa tatlo ka mga police commissioned officers nga ginsaylo sa NOCPPO sang nagligad nga semana.
Dugang pa, gin-designar bilang hepe sang Kabankalan City PNP si Police Lt. Alvimar Flores nga sadto hepe sang Provincial Intelligence Unit sang NOCPPO.
Ang bag-o nga hepe sang Hinigaran PNP amo si Major Clifford Batadhay nga sadto nadestino bilang Camp Commander sang NOCPPO kag Chief sang Provincial General Services Unit. | Aksyon John Diaz