Dakop ang apat ka mga magpakaisa sa Purok Astro Argentina, Brgy. Don Jorge Araneta, syudad sang Bago bangud sa kaso nga pagpangawat sadtong Enero 17.
Ang mga nadakpan ginkilala nga sanday Melvin Roquero, 27 anyos, Aries Roquero, 19 anyos, Larry Perez, 22 anyos kag 17 anyos nga pareho residente sang amo man nga lugar.
Suno kay Police Master Sergeant Edwin Jamandre, imbestigador sang Bago City PNP, nagpadangat sang reklamo ang security guard sang farm nga ginapanag-iyahan ni Banny Peña nga nadula ang battery sang isa ka Isuzu Tanker nga yara sa ila nga garahe.
Sang gin-usisa, nadiskubre nga nadula ang battery sang isa ka Isuzu Tanker 6RB1.
Gilayon man nga nagpatigayon sang imbestigasyon ang kapulisan kag ulihi nakit-an ang apat ka mga magpakaisa nga nagabitbit sang battery.
Sa follow-up operation, narekober sa gina-istaran sang mga suspek ang duha ka motolite LM enforcer batteries nga nagabalor sang masobra P15,000 pesos kag isa ka unit sang motorsiklo.
Priso karun ang tatlo ka mga suspetsad sa custodial facility sang Bago City PNP samtang ginturn-over naman sa Bago DSWDO ang menor de edad. | Aksyon John Diaz
