Ginkastigo kag ginkawatan ang isa ka negosyante sa Barangay Galicia, banwa sang Ilog pasado las 3 sang Martes sang kaagahon, Nobyembre 23.
Ang biktima ginkilala Rosby Bongcawil, 60 anyos kag residente sang Barangay Guilungan, sa amo man nga banwa.
Suno kay Police Captain Thurslie Castillo, hepe sang Ilog PNP, naglabay ang biktima sa grupo sang mga lalaki nga naga-inom kag ginhagda siya nga mag-inom apang nagpamalibad ini.
Wala maglaum si Bongcawil nga ginsundan siya sang apat ka mga suspetsado, ginkastigo kag nalipungan.
Ginkuha man sang mga suspek ang 30 mil pesos nga kapital kun tani sang biktima sa pagpamakal sang baboy.
Ang mga suspetsado ang personal nga ginkilala sang biktima nga sanday Jerrymar Gonzales, RJ Villarma, Argie Dela Peña kag Ryan Susano kag nadakpan sang kapulisan sang ginpatigayon ang hot pursuit operation.
Kaso nga robbery ang ipasaka sang kapulisan batuk sa apat ka nga suspek nga priso karun sa custodial facility sang Ilog PNP. | Aksyon John Diaz
