Natalana nga kakason sang syudad sang Bacolod ang requirement nga negative RT-PCR Test result para sa mga traveler sa Western Visayas kag Negros Oriental nga magasulod sa Bacolod.
Suno kay Dr. Chris Sorongon, deputy for medical sang Bacolod Emergency Operation Center, ginabalay na karon sang City Legal Office ang pag amyenda sang travel requirements sa mga traveler pasulod sa syudad.
Ini ang nangin tikang sang EOC matapos ang pila ka mga pangabay gikan sa nagkalain-lain nga sektor lakip na ang hanay sang mga negosyante nga kon mahimo kakason ang requirement nga negative RT-PCR Test Result.
Suno kay Sorongon, palarehas naman karon ang Alert Level status sa mga lugar sa Western Visayas nga yara sa Alert Level 3 kaangay sang Iloilo Province, Iloilo City, Bacolod kag Negros Occidental, kag importante nga ma balanse ang ekonomiya kag ikaayong lawas.
Napaidalum man sa Alert Level 3 ang Negros Oriental.
Pero ang mga travelers, ang dapat magpakita sang vaccination card nga sila ang fully vaccinated kontra Covid-19.
Ginklaro ni Sorongon, nga maga epekto lamang ang ini nga polisa sa tion nga mag gwa na ang executive order ni Mayor Evelio Leonardia nga naga amyenda sa travel requirement.
Suno pa sa Doktor, magapabilin naman ang iban nga requirement para sa mga traveler nga halin sa gwa sang Western Visayas.