Nakilala na ang lalaki nga nasapwan ang bangkay kaina sang kaagahon sa higad sang dalan sa Hacienda Mana-ul, Brgy. Matab-ang, syudad sang Talisay.
Sa interview sa Aksyon Firing Line, ginpahayag ni Talisay PNP deputy chief of Police Captain Ramil Bustamante nga mga las 5:30 sang hapon nagkadto ang pamilya kag ginkilala ang ila himata nga amo si Hermar Sarmorillo, 31 anyos kag pomuluyo sang Purok Datiles, Barangay Handumanan, syudad sang Bacolod.
Suno kay Bustamante, gin alegar sang utod nga kon san-o lamang nagapauli sa ila si Sarmorillo kag wala man sang permanente nga trabaho.
Dugang pa ni Bustamante, base sa pahayag sang pamilya, wala sang record ukon kaso si Sarmorillo apang subong may gin assign nga police personnel agod mag usisa angot sa background sang napatay.
Nahibaluan, nakit-an si Sarmorillo nga wala na sang kabuhi nga may duha ka pilas sa liog tuga sang pagpangluthang kag narecover sa eksena sang insidente ang 1 ka slug kag duha ka basiyo sang calibre 40 nga armas luthang. | Aksyon Ann Defensor via Aksyon Firing Line
