Naga laum si Punong Barangay Alfredo Talimodao Jr. sang Barangay Granada nga tumanon sang mga tag-iya sang kapehan kag mga resort nga nasakupan sang iya lugar ang ila ginhimo nga commitment sa lokal nga panguluhan sang Bacolod angut sa natalana nga pagpasira sang ila operasyon sa palaabuton nga Huwebes Hunyo 24.
Suno kay Talimodao, natalana nga maga patigayon sang monitoring ang iya talatapan angut sa kooperasyon kag bulig sang amo nga sektor sa tuyo nga ma punggan ang gina kabalak-an padayon nga pag saka sang kaso sang COVID 19.
Dugang pa ni Talimodao, ang sin-o man nga indi mag kooperar sa Executive Order nga gin papanaug sang Alkalde ang mahimo nga maga pangatubang sang kanselasyon sang ila business permit.
Gin klaro man sini nga indi lamang sa amo nga kahiwatan dapat mag bulig ang mga negosyante sa lokal nga panguluhan sang syudad, kundi sa adlaw-adlaw nila nga operasyon paagi sa pagpatuman sang naga kaigo nga health protocol kag kadamuon sang mga kliyente nga ila dapat ma akomodar.
Samtang, natalana man nga maga patigayon sang monitoring ang task force disiplina sa palaabuton nga Hunyo 24.
Suno kay Task Force Action Officer Wilfredo Taba Geolingo, ini nga tikang ang ginhimo man ni Leonardia tinalikdan nga tuig kag nangin madinalag-on man ang resulta.
Dugang pa ni Geolingo, indi lamang ang mga resorts kag kapehan ang ila paga libuton sina nga adlaw kundi naga lakip man sa mga Barangay nga may yara sang baybayon nga mahimo dugukan sang publiko sa tion sang selebrasyon. | Aksyon Art Tayhopon
