Luwas na sa katalagman ang walo ka tuig nga bata nga lalaki nga pilason sa shooting incident nga nagluntad sa Hda. Ledesma, Brgy. Matab-ang, syudad sang Talisay las 6:45 kagab-e, Martes (Marso 28).
Suno kay Police Lt. Abegael Donasco, Deputy Chief of Police sang Talisay City PNP, padayon karun nga ginabulong sa Corazon Locsin Montelibano Memorial Regional Hospital sa syudad ang biktima kag ginhingagaw nga ma-operahan agud makuha ang bala nga naglubong sa iya nga tiyan.
Wala labot sang pilas sa tiyan, nakaangkon man sang pilas sa abaga ang menor de edad.
Samtang, ipaidalom naman sa post morten examination ang bangkay sang mag-iloy.
Pagpahayag pa ni Donasco, nakabaton sila sang impormasyon nga ang suspek nga nagluthang sa mga biktima ang wala sang salakyan nga gingamit sa pagpalagyo apang ini ang gina-imbestigaran pa sang kapulisan.
Ginapasiguro sang kapulisan sa syudad sang Talisay nga padalman nila ang kaso nga pagpatay sa mag-iloy.
Ang mga napatay sa sining insidente ang ginkilala nga sanday Sherly Española, 50 anyos kag Jason Española, 20 ang edad kag pareho nga residente sang amo man nga lugar.
Suno kay Police Lt. Col. Cenon Vargas, hepe sang Talisay City PNP, nagapadayon pa ang pagproseso sang mga impormasyon nga natipon sang kapulisan sa komunidad may angut sa krimen.
Ginpaidalom naman sa ballistics examination ang mga narekober nga basiyo sang bala sa crime scene. Sa karun, blanko pa ang Talisay City PNP sa identity sang suspek sa krimen.
