Naglab-ot na sa 63 ang kaso sang cholera sa Negros Occidental.
Sa rekord sang Provincial Health Office (PHO), nagapanguna ang syudad sang Talisay nga may 22, ginasundan sang Silay 21, EB Magalona 13, Victorias 3, Cadiz 3, kag Manapla 1.
Duha sa mga pasyente ang nagkalamatay halin sa Silay kag EB Magalona.
Suno kay Provincial Health Officer Dr. Ernell Tumimbang, nagapabilin sa gihapon nga isa ang water sample nga nagpositibo sa cholera halin sa coastal barangay sang EB Magalona.
Dugang pa ni Tumimbang, isa sa mga rason sa pagsaka sang kaso amo ang unsanitary practices gani kinahanglan sa karon sang immediate interventions.
Pila sa mga interventions nga ginpresentar ni Tumimbang amo ang chlorination sa water sources, pag usisa sa water line agud masiguro nga wala sang leakage, pagkuha sang ginakonsumo nga tubig halin sa legitimate water sources kag pagmonitor sa mga pagkaon labi na sa mga ambulant vendors.
Magluwas sini, target man sang probinsiya nga mapadamo ang kabarangayan nga may Zero Open Defication (ZOD).
Nagligad nga Oktubre, ginpanawagan sang PHO sa mga local government units nga e-activate ang local drinking water quality monitoring committees (LDWQMCs) agud mapasangkad pa ang kampanya kontra sa waterborne kag foodborne diseases.
