Patay ang 22 nga criminology graduating student matapos mahulog sa ginasakyan nga trisikol sa Burgos-Extension Barangay Estefania, syudad sang Bacolod.
Ang biktima ginkilala kay Ayessa Abellar, 22 anyos, dalaga kag pumuloyo sang Purok 6 Barangay Granada syudad sang Bacolod.
Suno kay Police Capt. Peter John Ramos, hepe sang Police Staion 4, natulogan ang biktima durante naga-angkas rason nga nahulog ini sa trisikol.
Nalapakan naman ang biktima sang nagasunod nga isa ka mini-van color blue nga may rebite nga pula.
Gindala pa sa hospital si Abellar apang dead on arrival.
DRIVER SANG MINI-VAN, NAGSUNGKA
Nagsungka na sa Police station 4 ang driver sang mini-van nga aksidente nakalapak sa nahulog nga criminology student.
Sa interview sa Aksyon Reports Afternoon Edition, ginpahayag ni Police Captain Peter John Ramos, hepe sang police station 4, las 2 sang hapon, lunes, sang nagsungka ang driver sang mini van nga ginkilala sa kay Kimberly Rambillo.
Suno kay Ramos, nangibabaw ang kakulba ni Rambillo pagkatapos sang natabo rason nga wala siya gilayon nagsungka sa otoridad.
Priso karon si Rambillo sa custodial facility sang police station 4 kag nakagwa na man ang driver sang trisikol nga ginkilala kay John Helmar Pido.
Ginahulat sang kapulisan ang desisyon sang pamilya ni Abellar angot sa pagpasaka sang kaso.
