Nagapati si Provincial Inter-Agency Task Force (PIATF) action officer Atty. Rayfrando Diaz II nga ilegal ang Executive Order No. 53 nga gin-isyu ni Mayor Evelio Leonardia nga nagatugot sa mga fully vaccinated travelers nga makasulod sa syudad sang Bacolod, nga indi na kinahanglan magparehistro sa Safe, Swift, and Smart Passage (S-PaSS).
Suno kay Diaz, dapat ini nga matalupangdan sang Department of Interior and Local Government bangud ini ang nagasupak sa National Inter-Agency Task Force (NIATF) resolution 101.
Suno kay Diaz ang S-Pass amo ang Travel Management System agud mausisa kag maberepika ang COVID-19 vaccination cards, kag negative RT-PCR test.
Nagapati man si Diaz nga indi pa panahon agud halugan ang travel protocols bisan pa nga ara na sa alert level 2 ang Negros Occidental kag syudad sang Bacolod.
Nagligad nga Nobyembre 21, gin-anunsyo ni Emergency Operations Center – Task Force Executive Director Em Legaspi-Ang nga indi na kinahanglan ang S-Pass sa mga fully-vaccinated, Bacolod-bound passengers sandig sa ginpagwa nga EO No. 53 ni Mayor Evelio Leonardia.
Ginlaragway ni Diaz nga ‘false sense of security’ ang pagdula sang S-PaSS.
Suno kay Diaz, posible nga temporaryo lamang ang alert level 2 status sa syudad sang Bacolod kag Negros Occidental kag wala pa sang kasiguraduhan kun san-o gid matapna ang COVID-19.
Gin ehemplo ni Diaz ang natabo sa pungsod Germany kag bug-os nga Europa, sa diin liwat nga nagsaka ang kaso sang COVID-19.
Kalabanan sa mga travelers nga nagasulod sa Bacolod, ang nagabiyahe sa eroplano sa diin ang ginahugpaan sini amo ang airport sa syudad sang Silay, Negros Occidental.| Aksyon Marlon Genovea
