Nagpadangat sang reklamo ang pila ka mga netizens sa gin-aligar diotay nga tubod sang tubig sa Barangay Ma-ao syudad sang Bago.
Sa interview sang Aksyon Radyo Bacolod, ginkumpirmar ni Punong Barangay Jovito Gahaton nga madugay na siya nga nakabaton sang kaangay nga reklamo gikan sa mga residete.
Dugang pa ni Gahaton, makapila naman siya makapadangat sang reklamo sa Primewater nga amo ang water service provider sa mga panimalay sa proper sang Ma-ao.
Nagpatigayon naman sang hearing ang Sangguniang Panglungsod sa sini nga issue apang karun wala pa sang nakita nga pagbag-o sa supply sang tubig sa ila nga lugar.
Aminado si Gahaton nga may nabudlayan gid ang mga residente sa proper sang Ma-ao ilabi na mga establisyemento bangud limitado ang tubig nga nagagwa sa ila nga gripo.
Samtang, ang mga purok naman sa gwa sang Ma-ao proper ang ginahatagan sang supply pinaagi sa tangke kag water system nga ginpatukod sang barangay kag syudad sang Bago.
Sa karun, napulo na ka water system ang natukod sang barangay council rasun kun ngaa makabig ni Gahaton nga nagakaigo ang supply sang tubig sa mga kapurukan.
