Lansehanay sa ilegal nga droga ang isa sa mga anggulo nga nakita sang otoridad sa pagpatay sa isa ka drug surrenderer sa Brgy. Mambugsay, banwa sang Cauayan.
Ang biktima ginkilala kay Raymund Bolneo 42 anyos, residente sang Purok 1, Brgy. Bulata, sa amo nga banwa.
Sa inisyal nga pagpangusisa ni PMaj. Robert indiape, hepe sang Cauayan PNP, yara ang biktima sa gwa sang isa ka tindahan sa kilid sang dalan sa Brgy. Mambugsay upod sa iban pa nga mga nagatambay, hinali na lang ginpalapitan kag ginluthang sang suspek nga si Jessie John Zamora gamit ang cal. 45.
Ginhingagaw pa kon tani dal-on ang biktima sa Cauayan District Hospital apang gindeklarar nga dead on arrival matapos nakaangkon sang malubha nga pilas sa dughan.
Nakuha sa lugar sang insidente ang isa ka basiyo sang cal. 45.
Suno kay Indiape, ang suspek ang nalista naman bilang High Value Individual sang Kabankalan City Police Station kag nakapalagyo matapos ang krimen. | Aksyon Alvin Grava
