Gin-lockdown ang duha ka mga balay nga may 11 tanan ka indibidwal sa Grandville I Subdivision, sa Barangay Mansilingan, syudad sang Bacolod.
Ini kasunod nga naga paidalum sa strict home quarantine ang Patient 46 sang Bacolod nga isa ka 26 anyos nga babaye nga Locally Stranded Individual gikan Manila.
Suno kay Kapitan Boy Pico, ang Pasyente ang asymptomatic kag wala nakagwa sa ila balay samtang naga hulat sa resulta sang iya test. Dugang pa ni Pico, nagakooperar man ang tupad balay sang Covid-19 positive sa protocol nga ila gina patuman.
Natalana nga ipaidalum sa swab test ang mga himata sang pasyente lakip na ang ila kaingod balay nga gin lockdown.
Ini ang ikatatlo nga Covid-19 case sa Mansilingan nga naga paidalum sa home quarantine, kag una na sadto ang mag-asawa nga naga home quarantine man sa isa ka subdivision sa amo nga Barangay. | Aksyon Dale Salazar
