Nakilal-an na ang duha ka mga biktima sang pagpangluthang sa National Road, Sitio Galo, Brgy 5, banwa sang Isabela las 11 kahapon sang aga, Marso 28.
Ang mga biktima ang ginkilala nga sanday Randy Macasa, 51 anyos, may live-in partner kag residente sang Purok Esperanza kag Stephen Limen, 39 anyos, soltero kag residente sang Purok Market Vendors tanan sa Barangay Sibucao, banwa sang San Enrique.
Si Macasa ang nakaangkon sang duha ka pilas sa liog samtang pilas naman sa ulo ang naangkon ni Limen.
Suno kay Police Captain Arjay Dangarang, hepe sang Isabela PNP, nakilala ang mga biktima sa bulig sang resibo nga narekober sa crime scene. Kaina sang aga (Marso 29), personal man nga nagpadulong sa banwa sang Isabela ang pamilya sang mga biktima.
Sa karun, blanko pa sa gihapon ang kapulisan sa identity sang mga suspetsado kag sa motibo sa likod sang krimen.
Wala man sang may ginhagad nga impormasyon ang pamilya sang mga biktima nga makabulig kun tani tukod sang posible motibo ukon anggulo sa ginapatigayon nga imbestigasyon.
Sa report naman sang SOCO, narekober sa crime scene ang 12 ka basiyo sang bala sang kalibre 45 nga armas, isa ka wala naglupok nga bala sang kalibre 45 nga armas, isa ka metal jacket, isa ka metal fragment kag isa ka deformed metal fragment sang kalibre 45 nga armas-luthang.
BACKGROUND SANG MGA BIKTIMA
Imbolbado sadto sa ilegal nga droga ang duha sa mga napatay sa kaso sang pagpangluthang sa Isabela.
Suno kay Police Major Bonifacio Aral Jr. hepe sang San Enrique PNP, sa ila nga rekord, ginserbihan sadto sang search warrant sanday Randy Macasa, may live-in partner kag residente sang Purok Esperanza kag Stephen Limen, soltero kag residente sang Purok Market Vendors tanan sa Barangay Sibucao, banwa sang San Enrique.
Ini may angut sa kaso nga pagduso ukon paghupot sang ilegal nga droga.
Kadungan man sa pagserbi sang search warrant, ginpaidalom sa buy-bust operation ang mga biktima apang nadakpan lamang sang otoridad si Limen.
Suno pa sa hepe, matapos nga makagwa sa prisuhan sadtong tuig 2021 si Limen, wala na siya napaidalom pa sa surveillance bangud nga wala siya masami nagatinir sa ila nga lugar.
Samtang, ginpahayag naman ni Police Captain Dangarang, hepe sang Isabela PNP, nga si Macasa ang may ginapangatubang man nga kaso nga “disobedience to person in authority”. | Aksyon John Diaz
