Na aberiya ang makina ang Weesam 6 nga fastcraft nga may 172 ka pasahero samtang nagabiyahe padulong sa Ilo-ilo, Nobiembre 21, 2023.
Ginpahayag ni Philippine Coast Guard (PCG) –Negros Occidental Commander Joe Luviz Mercurio, las 11:30 sang aga sang nagbiya sa BREDCO Port ang barko apang gin-report nga nagkaproblema sa makina kag ini natabo sa tunga-tunga sa baybayon sang Bacolod kag Ilo-ilo.
Dugang pa ni Mercurio, pila ka pasahero ang naglain ang pamatyag bangod wala sang bentilasyon kag may masobra 30 minutos pa ang nakaligad sang sila ang nakadtu-an agod i-rescue.
Gilayon nakig angot ang PCG sa Arcturus Tug boat nga isa ka pribado nga sektor nga naga operate sa Bacolod sakay man ang mga personnel sang PCG para sa towing operation.
Alas tres sang hapon sang nakabalik sa BREDCO port ang barko nga gin-guyod sang tug boat kag gina sunod man sang isa pa ka rescue boat.
Samtang, magapatigayon sang imbestigasyon ang PCG angot sa natabo.
Suno kay alyas Mae, isa sa mga pasahero, nagtinir sang masobra duha ka oras sa tunga sang lawod ang weesam fastcraft matapos na aberiya.
Palayag ni Mae, kalabanan sa mga pasahero ang nakabatyag sang kakulba, ginhapo kag naglain ang pamatyag bangud sa natabo.
PAHAYAG SANG TAGDUMALAHAN SANG WEESAM EXPRESS
Ginpahayag ni Frank Carbon sang Weesam Express nga indi malikawan ang natabo nga engine failure sa mga barko tungod may kalawigon man ang kapasidad sang mga gina gamit nga materyales sa pagpalakat sang sakayan pandagat.
Sa interview sa Aksyon Reports Afternoon Edition, ginpaathag ni Carbon nga nadagdag ang tubo nga nagakonekta sa propeler rason nga nagka-problema sa pagpaandar sa sakayan.
Gindula man ni Carbon ang kahangawa sang publiko angot sa posibilidad nga matabo sa barko kag ginklaro nga maga-lutaw-lutaw lamang ang sakayan kon matabo nga mapatyan sang makina tungod balanse man ang pundasyon.
Samtang, ginpasiguro ni Carbon nga ila gin-refund ang mga pasahero nga nagpamalibad nga magsaylo sa ginpreparar nila nga barko.
