Ginpahayag ni Congressman Greg Gasataya nga si Pao Sy, anak ni anay Councilor Elmer Sy, amo ang gin rekomendar sang partido sa nasyunal nga Nationalist People’s Coalition ukon NPC nga mag bulos sa nabakante nga posisyon sang iya amay sa Sangguniang Panlungsod.
Suno kay Gasataya, district chair sang NPC sa Bacolod, napadala na ang komunikasyon sa Office of the President kag yara naman sa DILG.
Dugang pa ni Gasataya, iya ginpamangkot ang NPC kon ano ang nangin basehan sa rekomendasyon sang partido kag ginpalambot sa iya nga humalin sadto kon sin-o ang pamilya sang namatyan dira pagakuhaon ang magabulos.
Kon madumduman, ang NPC sa lokal sa Bacolod ang nag rekomendar kay Marlon Solidum nga magbulos kay Sy.
Si Solidum ang ginpili sang mayoriya sang mga NPC members nga yara sa Grupo Progreso antes paman sila nga nagsaylo sa Nacionalista Party.
Si Pao Sy, ang nagpadala man sang sulat nga nagapabutyag nga interesado nga magbulos sa posisyon sang iya nga amay. Suno kay Gasataya, hulaton na lamang ang desisyon sang office of the president.
Madumduman, Hunyo 25 sang nagtaliwan si Elmer Sy kag tubtob karon wala pa sang may nagbulos sa iya nabakante nga posisyon.
Si Pao Sy ang naga papili konsehal sa idalum sang Asenso Bacolod samtang si Solidum ang nagapapili man konsehal sa idalum sang Grupo Progreso.
