Plano sang Sangguniang Bayan sang La Castellana nga padal-an sang opisyal nga komunikasyon si Councilor Donato Dumaguit angut sa kapaslawan sini nga magtambong sa regular nga session sa konseho.
Ini ang impormasyon nga nakuha mismo ni Mayor Rhummyla Nicor Mangilimutan gikan kay Vice Mayor Bordig Nicor.
Dugang pa ni Mangilimutan, may pila ka importante nga mga ordinansa kag resolusyon nga kinahanglan mapirmahan sang konsehal.
Suno pa sa Alkalde, kon matuod gid man nga wala sang kahilabtanan si SB Dumaguit sa amo nga kontrobersiya, dapat lamang nga ini ang mag gwa kag atubangon ang amo nga isyu.
Lubos nga ginpanindugan ni Nicor-Mangilimutan nga wala sang basehan ang alegasyon ni SB Donato Dumaguit nga pamolitika lamang ang rason kon nga-a nadalahig ang iya ngalan sa recruitment scam nga reklamo.
Suno kay Mangilimutan, magluwas nga kaalyado sini sa politika si Dumaguit, bulan pa lamang sang Abril nag gwa ang isyu angut sa involvement sang konsehal sa amo nga modus, apang bangud nga wala man sang pormal nga tag reklamo batuk kay Dumaguit ini ang wala man ma aktuhan sang talatapan.
Suno pa kay Mangilimutan, kon may anomaliya nga na diskobrehan si Dumaguit batuk sa iya administrasyon, dapat kon tani nga ini ang iya na lamang nga gindala sa husto nga venue.
Mas labing maayo nga himuon sang konsehal suno pa sa Alkalde, amo ang pag atubang sa reklamo nga ginpasaka sa korte.
