GOV LACSON NAG MANDO SA MGA EMPLEYADO SA ISA KA TALATAPAN SA KAPITOLYO NGA MAG PA SWAB TEST

Share on facebook
Share on google
Share on pinterest
Share on twitter
Share on print

Ginmando ni Negros Occidental Governor Bong Lacson sa mga empleyado sang isa ka opisina sa kapitolyo probinsiyal, nga magpaidalom sa RT-PCR swab tests.

Ini matapos magpositibo sa Covid-19 ang isa ka empleyada nga naka close contact sa myembro sang iya pamilya nga una nagpositibo sa virus.

Sa press statement sang gobernador, iya ginsiling nga daku ang iya paglaum nga mag-ayo sa labing madali nga panahon ang tanan nga mga nagpositibo sa Covid-19 sa Negros Occidental.

Ginmando man sang gobernador ang temporaryo nga pagpasira sa amo nga opisina, agud ipaidalom sa disinfection.

Hulyo 28 sang gin RT-PCR test ang empleyada kag subong nga adlaw sang maguwa ang positibo nga resulta.

Siya ang residente sang syudad sang Bacolod kag wala na nagduty umpisa sadtong Hulyo 23, matapos maglain ang pamatyag sang iya lawas. | Aksyon Marlon Genovea

TOP 4 DRUG PERSONALITY SANG KABANKALAN PNP, NADAKPAN

Liwat magapangatubang sa dugang nga kaso ang Top 4 drug priority target list sang Kabankalan City Police Station matapos nakuhaan sang ilegal nga druga sa Sitio Nato, Brgy. Aguisan, syudad sang Himamaylan kagab-i, Hulyo 28.

Ang suspek ginkilala kay Joy Jen Utana, 28 anyos residente sang Brgy 6, syudad sang Kabankalan.

Suno kay PLt. Arturo Margallo, Deputy Chief of Police sang Himamaylan City Police station, si Utana ang nalista bilang number 1 most wanted person sang Kabankalan PNP kag paagi sa Manhunt Charlie Operation, tigayon nga ginserbi sa iya ang mandamiento de aresto sa kaso Violation of Sec. 5, sang R.A. 9165, kag wala sang piyansa batok sa iya.

Sa pag-aresto, narekober sa iya ang 1 ka gramo sang ginasuspetsuhan shabu nga may Standard Drug Price 6,800.

Si Utana ang priso karon sa custodial facility sang Himamaylan PNP kag ginahanda na ang kaso paghupot sang ilegal nga druga kag drug paraphernalia batok sa iya. | Aksyon Alvin Grava

DOH MAGAPATIGAYON SANG SITE INSPECTION SA POSIBLE PATUKURAN SANG BACOLOD GENERAL HOSPITAL

Magapadulong ang DOH sa syudad sang Bacolod para sa site inspection sa lugar nga posible pagatukuran sang Bacolod General Hospital.

Ini matapos nga damlag lang, ginpabalo sang DOH si Congressman Greg Gasataya nga ginlakip na sang Department of Budget and Management ukon DBM ang pondo para sa pag tukod sang hospital sa 2022 National Expenditure Program.

Suno kay Gasataya, tinalikdan nga semana sang ginpabalo siya sang DOH nga luyag nga magpadulong sa Bacolod para sa site inspection pero wala pa sang pat-od nga petsa.

Nagpangabay man si Gasataya sa DPWH kag DOH nga mag himo sang perspective sang hospital bilang preparasyon sa natalana nga budget deliberation sang kongreso.

Suno sa Kongresista, indi pa niya mapalayag ang mga lugar nga posible tukuran sang hospital pero nagapabilin pa nga bukas sa tion nga may luyag pa nga magtanyag sang propedad.

MORE STORIES:

LIKE US ON FB

error: Ooops... You are not authorized to copy this content.