Ginpaidalom sa granular lockdown ang Purok Rizal, Brgy. Calubang banwa sang Ilog, Negros Occidental sang nagpositibo sa COVID-19 ang isa ka OFW nga residente sang nasambit nga lugar.
Sa interview sa Aksyon Hotline, ginpahayag ni Brgy. Calubang Punong Barangay Menierva Gersan nga may isa ka OFW gikan sa Canada sang Purok Rizal ang nagpauli sa ila nga lugar agud magtambong sa kasal.
Bilang requirements sa pagbalik sa Canada nagpaidalom sa RT-PCR Test ang nasambit nga OFW kag ini ang nag-positibo sa virus.
Bilang tikang, ginmando sang Municipal Health Office (MHO) ang pag-cordon sa balay sang OFW kag pagpaidalom sa antigen testing sang pamilya apang ini ang nagpamalibad.
Bangud sini, nadesisyonan sang MHO nga ipaidalom sa granular lockdown ang bilog nga Purok Rizal.
Nagpabutyag na man sang pagkabalaka si Gersan matapos nga wala pa sang may nabaton nga impormasyon kun may napain nga ayuda para sa mga residente sang Purok Rizal nga naulamid bangud sa pagpakatig-a nga magpaidalom sa antigen test sang isa ka pamilya. | Aksyon Dorel Cabatu