Ginpahayag ni Cynthia Reyes, AVP sang Automobile Association of the Philippines nga nagahimo sila sang mga programa agud mabuhinan ang numero sang mga aksidente sa pungsod Pilipinas.
Sa mensahe ni Reyes sa pag komemorar sang World Day of Remembrance for Traffic Victims and Survivors, dapat kabalo magsunod sa mga traffic rules and regulations ang mga driver kag publiko agud malikawan ang aksidente.
Palayag ni Reyes base sa record sang Highway patrol group, 34 ka indibidwal ang nagakapatay kada adlaw sa aksidente kag pito diri ang kabataan kag yara sa kapin 12,000 kada tuig.
Sa bug-os nga kalibutan kapin 3500 ka persona ang ginabawian sang kabuhi bangud sa aksidente kada adlaw kag 500 diri ang kabataan kag 1.3 million kada tuig ang kabug-usan nga casualties.
Nagapasalamat man si Reyes sa gobyerno sang Probinsya sang Negros Occidental sa pagbaton ang STAY BRIGHT program nga nakafocus sa estudyante kag mga organisasyon kag indibidwal nga nagapatuman sang layi sa trapiko.
Tuyo sang programa nga mapalab-ot sa mga kabataan ang Road safety awareness.
