Nagpangabay ang Grupo Progreso sa Comelec Bacolod nga tugutan ang presensya sang ila mga registration watchers sa nagapadayon nga voter registration.
Si Mayor Bing Leonardia, head convenor sang GP, ang nagpadala sang sulat sa Comelec napetsahan Setyembre 14 para sa amo nga pangabay.
Nasaad sa sulat sang Alkalde, ang Comelec Resolution No. 10549 napetsahan Hulyo 18, 2019, para suportahan ang ila nga pangabay.
Nasaad sa isa ka section sang resolution, nga ang kada registered nga partido ukon organisasyon ang pwede nga magpahamtang sang watcher sa tion sa pagbaton sang application kag sa tion sang Election Registration Board hearing.
Ang GP ang isa ka lokal nga grupo sa Bacolod nga ginabug-usan sang nagkalain-lain nga indibidwal nga may partido sa politika sa nasyunal kaangay sang PDP-LAban, Nationalist People’s Coalition, kag Nacionalista Party.
Nag pakigangut ang Aksyon Radyo Bacolod kay Atty. Ma. Fatima Aspan, acting election officer sang Comelec Bacolod kag acting Provincial Supervisor, pero wala pa ini makasabat.
