Nagpadala sang sulat ang hanay sang mga negosyante sa syudad sang Bacolod nga naga pangabay nga palawigon sang isa pa ka bulan ang Business One Stop Shop ukon BOSS nga magatakop na sa Enero 20.
Suno kay Bacolod Vice Mayor El Cid Familiaran, ang sulat ang gin padala ni Metro Bacolod Chamber and Commerce Industry ukon MBCCI President Frank Carbon tinalikdan nga semana.
Gina suportahan ni Familiaran ang pagpalawig sang BOSS para mahatagan sang nagakaigo nga tion ang mga negosyante nga mag proseso sang ila mga business permit.
Suno kay Mayor Evelio Leonardia, iya na gin endorso sa konseho ang pangabay sang mga negosyante nga palawigon ang BOSS.
Ang SP ang kinahanglan nga mag pasar sang ordinansa para paboran ang pangabay sang mga negosyante.
Base sa record sang permits and Licensing Division, masobra 11 mil na ang business registration sa Bacolod umpisa nga nag sugod ang BOSS sadtong Enero 2. | Aksyon Dale Salazar
