Patay ang isa ka high school student samtang walo ang pilason sa pagbungguanay sang isa ka motorsiklo kag depasahero nga traysikol sa Hacienda Layagan, Barangay Lalagsan, banwa sang La Castellana pasado las 5 ang takna kahapon, Mierkoles (Enero 18).
Suno kay Police Staff Sergeant Adronico Tribaco, imbestigador sang La Castellana PNP, ang napatay nga naga-edad sang 15 anyos amo ang nagamaneho sang Rusi 125 nga motorsiklo.
Dugang pa ni Tribaco, nakabunggo ang motorsiklo nga ginamaneho sang biktima sa traysikol nga ginamaneho ni Atancio Mallari Jr., 57 anyos kag residente man sang Barangay Lalagsan.
May lima naman ka mga pasahero nga sakay ang traysikol nga ginamaneho ni Mallari kag lunsay tanan mga menor de edad kag pilason. Pagpahayag ni Tribaco, madasig ang pagpadalagan sang motorsiklo kag nagbunggo ini sa traysikol nga nagapaliko naman sa bangga sang Hacienda Layagan.
Pilason man ang duha ka iban pa nga mga menor de edad nga angkas sa motorsiklo.
Hungod nga wala ginhingadlan sang kapulisan ang pangalan sang napatay kag mga menor de edad nga pilason.
Sa karun, natalana nga magpakigsapol si Tribaco sa pamilya sang mga imbolbado sa aksidente agud mahibaloan ang ila mga plano. | Aksyon John Diaz | La Castellana Photos