Isa patay, duha pilason sang nagkarambola ang lima ka salakyan sa Crossing Bag ong dalan, Barangay Cabahug, syudad sang Cadiz las 3:58 sang hapon, Mierkoles.
Ang napatay ginkilala sa kay Arlo Galleron, 31 anyos kag pilason naman sanday Roger Decanay, 30 anyos kag Joseph Coniendo, 53 anyos.
Imbolbado sa aksidente ang Ten wheeler truck nga ginadala ni Arturo Pateño, 42 anyos; Dump truck nga ginadala ni Coniendo; motorsiklo nga ginadala ni Decanay; isa pa ka motorsiklo nga ginadala ni Galleron kag isa ka trisikol nga naka-park lamang sa kilid dalan.
Sa pagpangusisa sang Cadiz City PNP, nagasundanay ang ten wheeler truck kag Dump truck kag sang nakalab ot sa lugar, nagliko patuo ang ten wheeler rason nga na -alang alang ang nagasunod nga dump truck kag nagbunggo sa nalikod nga porsyon sang ten wheeler.
Tungod sa impact, nagbalabag ang dump truck kag naderitsuhan naman sang ten wheeler truck ang naka-park nga trisikol kag nagbunggo pa sa puno sang kahoy nga gimelina.
Pagbalabag sang dump truck, naigo sini ang naglabay nga duha ka motorsiklo sa diin, isa sa driver ang nag upod guid dasok sa idalom sang salakyan.
Sa inisyal nga imbestigasyon, gin alegar wala nag-apply sang signal nga magliko ang 10-wheeler truck rason nga natabo ang aksidente.
Sa karon, temporaryo nga ginkustodiya sang Cadiz City PNP si Coniendo nga nangin outpatient man sa Cadiz City District Hospital matapos naka agom sang minor nga pilas sa lawas.
