Patay ang drayber sang motorsiklo kag pilason ang angkas sini matapos mabungguan sang pick-up las dos pasado kahapon, Biernes sa National road, Brgy Patic, banwa sang Pulupandan.
Ang napatay ginkilala kay Gilbert Dumasig, 28 anyos, residente sang Purok Balongay Palaka Norte, Pulupandan samtang pilason naman ang angkas sini nga si Richard Jamora, 18 anyos, empleyado sang Bugrong Pulang Duta, sa syudad sang Bago.
Ang driver sang pick-up ginkilala kay Joel Magalgalit, 30 anyos, residente sang Brgy.Canjusa, sa amo nga banwa.
Sa inisyal nga pagpangusisa ni PCapt. Ryan Villasario, hepe sang Pulupandan PNP, nagabiyahe si Magalgalit halin sa Crossing Pulupandan padulong sa Pulupandan proper sang aksidente sini nga nabungguan ang nasugata’ nga motorsiklo nanday Dumasig.
Samtang, las 8 kaina sang aga sang ginpagwa na sa prisuhan si Magalgalit pagkatapos sang 18 oras nga reglimentary period.
Handa naman si Magalgalit nga sabton ang balayran sa pagpalubong kag hospital sang mga biktima. | Aksyon Alvin Grava
