Isa ang patay kag lima ang pilason sa aksidente nga nagluntad sa National Highway nga sakop sang Brgy. San Juan, banwa sang Pontevedra.
Suno kay Police Staff Sergeant Genesis Beñas, traffic investigator sang Pontevedra PNP, imbolbado sa aksidente ang isa ka Mitsubishi Canter kag traysikol nga gikan sa magkatuhay nga direksyon.
Ang Mitsubishi Canter nga ginamaneho ni Nolito Montebon, 42 anyos, sang Purok Boulevard, Brgy. 14 syudad sang Bacolod samtang ang traysikol ginamaneho naman ni Rogin delos Pobres, 34 ang edad.
Duha ang pasahero sang traysikol kag duha man ang pahinante sang canter.
Suno kay Beñas, naglupok ang goma sa wala nga bahin sang canter kag nag-agaw sa linya sang traysikol.
Bangud sang impact, nagderetso sa sementado nga pader ang traysikol samtang nagderetso naman sa steel gate sang isa ka balay ang canter kag nawasak ang uluhan sang salakyan.
Dead on arrival sa ospital ang isa sa mga sakay sang traysikol nga ginkilala kay Joselyn Madalag, legal ang edad.
Ang mga pilason ang padayon naman nga ginabulong sa ospital sa syudad sang La Carlota.
Sa imbestigasyon sang kapulisan, nahibaloan nga madasig ang pagpadalagan sang drayber sang canter antis pa man nagluntad ang aksidente.