Aprobado sang Sangguniang Panlungsod sa syudad sang Bacolod ang anum ka bulan nga suspension batuk kay Punong Barangay Joseph Delos Santos sang Barangay 16 base sa unanimous nga desisyon sang konseho sa ila regular nga sesyon kahapon nga adlaw.
Suno kay Councilor Al Victor Espino, chairman sang Committee on Laws and ordinances, ang rekomendasyon sang iya komitiba nga gin updan sang konseho ang gin base sa mga ebedinsya nga gin presentar sang mga tagreklamo batuk kay Delos Santos.
Dugang pa ni Espino, nag agi sa naga kaigo nga proseso ang amo nga kaso sa diin gin hatagan man sang oportunidad ang magtimbang nga bahin sa pag presentar sang ila mga position paper.
Suno pa sa konsehal, napamatud-an sang iya komitiba nga may yara sang klaro nga bayolasyon ang kapitan kon nga-a ini ang gin papanaugan sang amo nga desisyon.
Ginklaro man sang konsehal nga labing una ini nga natabo sa Bacolod sa diin gin pamatbatan sang konseho ang isa ka opisyal nga gin reklamo.
Sa nahibaluan nga nag ugat ang administrative complaint sang pila ka mga opisyales sang amo man nga lugar batuk sa ila kapitan bangud sa delay nga pag release sang ila honorarya ilabi na ang reklamo nga falsification sang 2021 Annual budget sang Barangay.
Bukas ang Aksyon Radyo Bacolod para sa sabat ni Delos Santos. | Aksyon Art Tayhopon
