Blanko pa ang kapulisan sa motibo sa pagpatay sa gin-aligar isa ka anay miembro sang RPA-ABB sa Sitio Sambag, Barangay Manghanoy sa banwa sang La Castellana.
Sa report sang La Castellana PNP, nasapwan na lamang nga patay si Jose Rammel Europa, 47 anyos sang Sitio Cabadingan, Barangay Camandag sa amo man nga banwa.
Dugang pa, nagpang-kuryente sang isda si Europa upod ang iya hinablos antis natabo ang krimen. Basi man sa report, ang hinablos man mismo ni Europa ang nagpahibalo sa mga himata sini sa nadangatan sang biktima.
Si Europa ang nakaangkon sang pilas tuga sang pagpangluthang. Narekober man sa crime scene ang isa ka naglupok nga bala sang kalibre 45 nga armas-luthang.
Tubtob subong, wala pa makapagwa sang impormasyon, imbestigasyon kag detalye sang sini nga krimen ang hepe sang La Castellana PNP nga si Police Major Rhojn Daryl Nigos. | Aksyon John Diaz
