Magadepende sa kadasigon sa pagsumiter sang project proposal ang pag-aprobar sang gobyerno probinsiyal sa P100,000 nga cash subsidy sa mga Local Government Units (LGUs) sang Negros Occidental nga magabukas sang pavilions sa Panaad Park and Stadium Brgy. Mansilingan syudad sang Bacolod.
Suno kay Provincial Administrator Atty. Rayfrando Diaz II, ang banwa sang La Castellana amo pa lamang ang nakasumiter kag posible nga amo man ang una nga mahatagan sang pinansiyal umpisa sa masunod nga semana.
Dugang pa ni Diaz, ginhatagan na sang otoridad si Governor Bong Lacson agud magpirma sang amo nga proposal pati na sang memorandum of agreement.
Ginklaro ni Diaz nga ang cash subsidy gastuhon sang LGUs para sa ila aktibidad ilabi na sa pag showcase sang cultural activities, arts, crafts, kag local cuisine pareho sa LakBAYANihan Tourism Fair 2022 nagligad nga Mayo.
Ang pagbukas sang LGU pavilions sa Panaad ang partisipasyon sang probinsiya sa MassKara Festival sa syudad sang Bacolod.
