Arestado ang 42 anyos nga lalaki matapos nakuhaan sang armas kag ilegal nga droga sadtong Marso 15 sa sulod sang iya puloy-an sa Purok San Agustin 3, Barangay 2, syudad sang La Carlota.
Ang naaresto ginkilala kay Lawrence Egay.
Suno kay PLt. Col. Lowelle Garinganao, paagi sa search warrant gikan sa korte, ginsulod kag nausisa sang mga otoridad ang balay ni Egay kag narekober ang isa ka .38 cal. revolver nga may apat ka bala.
Narekober man sa iya puloy-an ang isa ka plastic sachet sang ginasuspetsuhan shabu ginalubanta 1 ka gramo ang kabug-aton nga may standard drug price nga 6,800 pesos.
Ginpahayag man ni Garinganao, si Egay ang yara sa listahan sang La Carlota City Drug Enforcement Team bilang street level individual drug personality kag notorious nga kawatan sa syudad.
Si Egay ang priso karon sa custodial facility sang La Carlota City Police Station kag nagapangatubang sang duha ka kaso nga paglapas sa R.A 10591 kag paglapas sang Sec. 11 sang R.A. 9165 ukon paghupot sang ilegal nga druga. | Aksyon Alvin Grava
