Pilason ang isa ka lalaki matapos gintiro sang kaugalingon sini nga pakaisa sa Hacienda Luisa, Brgy. 13, syudad sang Victorias pasado las 8 kagab-e, Hulyo 30.
Ang biktima ang ginkilala kay Ruben Basa, 41 anyos kag residente sang Jaime Reyes Street, Brgy 1. Poblacion, EB Magalona samtang ang suspetsado naman ang ginkilala kay Roland Mirambel, 41 ang edad kag residente naman sang Brgy 13, syudad sang Victorias.
Suno kay Police Major Joy Ellaga, Deputy Chief of Police sang Victorias City PNP, nagamaneho sang motorsiklo si Basa sang gintiro ni Mirambel.
Nakaangkon sang pilas sa tuod nga abaga si Basa.
Ginkuha naman ni Mirambel ang motorsiklo ni Basa kag gingamit sa pagpalagyo samtang nakatigayon naman nga makapangayo sang bulig ang biktima kag karun ginabulong na sa ospital.
Suno kay Ellaga, pagpangimon ang nagapanguna nga anggulo nga ginatutukan sang kapulisan sa amo nga kaso.