LALAKI, NADAKPAN MATAPOS NAKUHAAN SANG 14K NGA DROGA SA BRGY. BANAGO

BACOLOD TARGET MABAYARAN ANG MGA SUPPLIER SA SULOD 30 DIAS MATAPOS ANG DELIVERY

Target nga mabayran sang Bacolod LGU ang mga supplier sa sulod sang 30 dias matapos nga madeliver ang ila ginasupply sa syudad.

Ini ang isa sa mga gintalakay sa ginaduso 3.6 bilyones pesos sa masunod nga tuig sa budget deliberation ni Mayor Albee Benitez kaupod ang mga konsehal kag mga department head sang weekend.

Sa press conference, Lunes, ginbulgar ni Mayor Albee Benitez, nga naglambot sa iya impormasyon nga may mga supplier nga indi na luyag nga magpasakop sa bidding bangud nagaka delay nga pagbayad sang LGU.
Suno sa Alkalde, may mga supplier nga nagadugang sang cost of money ukon interest sang duha ukon tubtob tatlo ka bulan.

Ginehemplo man ni Benitez, nga may supplier sang 2020 nga transaksyon, ang karon gapanukot pa sa syudad.

Ginpahayag ni Mary Jean Ramos, City Planning and Development Officer sang LGU, nga may internal audit ang syudad nga gintugyanan para masiguro nga masunod ang 30 dias nga pag proseso sang bayad sa tuyo nga mapanubo sang syudad ang purchase request.

Ginatan-aw sang mga opisyal nga makakinot ang syudad sa sini nga sistema.

Samtang, ginpahayag ni Benitez nga sa una nga semana sang Oktubre iya igasumiter ang budget proposal sa SP.