Dakop ang isa ka lalaki matapos nakuhaan sang ilegal nga droga kag ilegal nga armas sa buy-bust operation sa Purok Paraiso 2, Barangay Taloc, syudad sang Bago pasado las 12 sang udto, Nobyembre 21.
Ang suspetsado ginkilala kay Edgardo Cuayson, 51 anyos kag residente man sang amo nga lugar kag ginakabig man nga street level individual.
Nakuha kay Cuayson ang 10 ka sachet sang ginasuspetsushan shabu nga ginabulubanta nagabug-at sang masobra isa ka gramo kag nagabili sang 7,480 pesos, drug paraphernalia kag ang 500 pesos nga buy bust money.
Nakumpiskar man kay Cuayson ang isa ka kalibre 22 nga armas kag may lima ka mga wala naglupok nga bala.
Priso karun si Cuayson sa custodial facility sang Bago City Police Station. | Aksyon John Diaz