Patay ang isa ka lalaki matapos gin-aligar aksidente nga natiruhan ang iya kaugalingon sa ilimnan sa Purok. 5, Brgy. Poblacion, banwa sang Cauayan pasado las 9 sang gab-e, Disyembre 4.
Ang biktima ang ginkilala kay Jeemo Redimo, 37 anyos sang Purok 5 samtang upod sini sa ilimnan si Benjie Chavez, 28 anyos sang Purok 3, tanan sang Barangay Poblacion, banwa sang Cauayan.
Suno kay Police Major Garry Allan Resuma, hepe sang Cauayan PNP, halin sa ilimnan sanday Redimo kag Chavez sang nagluntad ang krimen.
Sa imbestigasyon sang kapulisan, ginpahayag ni Resuma nga gin-aligar ni Chavez nga ginhampangan sang biktima ang iya kalibre 38 nga revolver kag sang gintaya niya ini sa ulo aksidente nga naglupok ang armas.
Pilas sa ulo ang naangkon ni Redimo nga gintunaan sang iya nga kamatayon.
Pagpahayag ni Resuma,nagapangita sila sang saksi nga mahimo nakakita sang krimen agud maklaro ang matuod nga natabo.
Sa karun, nagapabilin priso sa custodial facility sang Cauayan PNP si Chavez. | Aksyon John Diaz