Patay ang isa ka lalaki matapos nga natiruhan samtang nagapanagat sa baybayon sakop sang Balidian, Concepcion, Iloilo ala una kaina sang hapon, Hwebes nga adlaw.
Ang biktima ang ginkilala nga si Joel Gulisao, 38 anyos, kasado, residente sang Bantayan Island Cebu, pero temporaryo nga naga puyo sa Barangay Tiglawigan, syudad sang Cadiz.
Sakay ang biktima sa pumpboat kaupod sanday Johny Legaspi, 49 anyos, kag Dennies Santerna, 45 anyos, mga reisdente sang Brgy. Lipayran, Bantayan Island, sang natabo ang insidente.
Ginpahayag sang kaupdanan sang biktima, nga nakabati na lamang sila sang isa ka lupok kag naiguan ang biktima sa likod.
Alegasyon sang upod sang biktima nga ang nagluthang ang gikan sa isa man ka pumpboat nga may kapin lima ang sakay kag indi nila kilala.
Mga las 5 sang Hwebes sang hapon sang gindala ang biktima sa Cadiz District Hospital pero gin deklarar nga dead on arrival. |Aksyon Roger Gutib