Pilason ang isa ka lalaki matapos ginbuno sang iya upod sa ilimnan sa Sitio Bat-os, Brgy. Zone 11 syudad sang Talisay las 3:50 sang Domingo sang hapon (Marso 26).
Ang biktima ang ginkilala kay Leo Cabarles, 54 anyos kag residente sang Purok Sampaguita samtang ang suspetsado naman ang ginkilala kay Romeo Escubido, 56 anyos kag residente sang Sitio Bat-os tanan sa Barangay Zone 11 sa amo man nga syudad.
Suno kay Police Lt. Abegael Donasco, Deputy Chief of Police sang Talisay City PNP, upod lang man sa ilimnan ang biktima kag ang suspek antis natabo ang krimen.
Una nga nagluntad ang komosyon sa tunga sang suspek nga si Escubido sa tiyo sang biktima nga ginkilala naman kay Enrique Tajanlangit.
Apang suno kay Donasco, ang biktima nga si Cabarles amo ang una nga nagtapungol sa suspetsado.
Nagkuha naman sang patalom si Escubido kag ginbuno sa likod ang biktima nga karun ginabulong sa ospital.
Samtang, ginkumpirmar ni Donasco nga wala sang plano nga magpasaka sang kasi ang biktima batuk sa suspetsado | Aksyon John Diaz
