Nahunong sa custodial facility sang Talisay City Police Station ang isa ka lalaki matapos aksidente nga natiruhan ang iya tupad balay sa Hda. Agho, Brgy. Dos Hermanas, syudad sang Talisay alas 11:30 sang gab-i, Nobyembre 18.
Ang suspek ginkilala kay Ronel Lobeñero samtang ang biktima ginkilala naman kay Terry Casagan 53 anyos lunsay residente sang amo nga lugar.
Sa inisyal nga pagpangusisa ni PMaj. Wilfredo Benoman Jr., deputy chief of police sang Talisay City PNP, nagaupdanay inum ang suspek kag ang duha ka bata ni Casagan nga sanday Jommy kag Gerald upod man si alyas Bantol.
Dugang pa ni Benoman, bangod man sa kahulogbon ni Lobeñero, nagpalupok ini sang iya armas sa semento kag aksidente nga naigo sa tuo nga paa si Casagan.
Gilayon naman nga gindala sa Talisay City Health Office ang biktima antis ginsaylo sa CLMMRH.
Dugang pa ni Benoman, paagi sa follow-up operation sang kapulisan, naarestu si Lobeñero kag narekober sa iya ang (1) isa ka Homemade revolver nga may 4 ka mga bala kag isa ka empty shell sang Magnum 357.
Ginpahayag man ni Benoman nga ginahanda na sang kapulisan ang duha ka kaso nga indiscriminate firing kag paglapas sang comelec gunban batok kay Lobeñero.
