Pilason ang isa ka stockman matapos ginluthang sang riding in tandem sa Hacienda Palma, Sitio Taubangi, Barangay Andulauan, banwa sang Ilog pasado las 7 kagab-e, Enero 23.
Ang biktima ang ginkilala kay Reynaldo Tingal, 42 anyos, residente sang Sitio Embarkadero, Baragay 1 sa amo man nga banwa.
Suno kay Police Staff Sergeant Jonason Villanueva, imbestigador sang Ilog PNP, nagamaneho sang motorsiklo si Tingal kag papauli halin sa iya trabaho sang nagluntad ang krimen.
Si Tingal ang ginluthang sang duha ka mga persona nga nagasakay sa isa ka motorsiklo sang naka-anum ka beses.
Natumba ang motorsiklo nga ginasakyan ni Tingal kag nakatinguha pa siya nga makadalagan pasulod sa kampo.
Nakaangkon ang biktima sang pilas sa likod, wala nga bahin sang iya nga ilok kag tuo nga paa.
Suno naman kay Tingal, wala siya sang kontra kag wala man siya nakahibalo sa motibo sa likod sang krimen.
Ang biktima ang ginabulong karun sa ospital sa syudad sang Kabankalan. | Aksyon John Diaz
